Pro 28 | NdeIBE | STEP | Umuntu omubi uyabaleka loba engaxotshwanga muntu, kodwa abalungileyo balesibindi njengesilwane.

Proverbs 28

1 Umuntu omubi uyabaleka loba engaxotshwanga muntu, kodwa abalungileyo balesibindi njengesilwane.

2 Nxa ilizwe lihlamuka liba lababusi abanengi, kodwa umuntu ozwisisayo lololwazi ugcina ukuthula.

3 Umbusi ocindezela abayanga unjengezulu elinengi elitotisa amabele.

4 Labo abaphikisa umthetho bakhuthaza izigangi, kodwa labo abawugcinayo bayazenqabela.

5 Abantu ababi kabakuzwisisi ukwahlulela kuhle, kodwa labo abamdingayo uJehova bayakuzwisisa kakhulu.

6 Ungcono umyanga ohamba ngokulunga kulesinothi esilezindlela zokungcola.

7 Lowo ogcina umthetho yindodana eqedisisayo, kodwa umngane wezixhwali uyangisa uyise.

8 Lowo owandisa inotho yakhe ngenzaliso eyeqileyo uyibuthela omunye ozaba lomusa kubayanga.

9 Loba ngubani ongawulaleliyo umthetho, lemikhuleko yakhe izakuba yisinengiso.

10 Lowo oholela olungileyo endleleni embi uzawela emjibileni wakhe, kodwa ongelacala uzakwamukela ilifa elihle.

11 Umuntu onothileyo angazibona ingathi uhlakaniphile, kodwa umyanga oqedisisayo uhle abone ukuthi kasumuntu.

12 Nxa olungileyo enqoba kulokujabula okukhulu; kodwa nxa omubi ethatha umbuso abantu bayacatsha.

13 Lowo ofihla iziphambeko zakhe kayikuphumelela, kodwa lowo ozivumayo azitshiye ufumana umusa.

14 Ubusisiwe umuntu ohlala emesaba uJehova, kodwa lowo oyenza lukhuni inhliziyo yakhe uwela enkathazweni.

15 Njengesilwane esibhongayo loba ibhere elihlaselayo unjalo umuntu omubi nxa ebusa abantu abangelamandla.

16 Umbusi ocindezelayo wehluleka ukwahlulela kuhle, kodwa lowo ozonda inzuzo yokuganga uzakuba lempilo ende.

17 Umuntu odliwa ngumzwangedwa wokubulala omunye uzaba ngohlala ebaleka aze ayokufa; akungabi lamuntu omsekelayo.

18 Lowo ompilo yakhe ingelacala uvikelekile, kodwa ondlela zakhe zixhwalile uzakuwa masinyane.

19 Lowo osebenza amasimu akhe uzathola ukudla okunengi, kodwa lowo ophika ngezifiso zeze uzakuba ngumyanga onukayo.

20 Umuntu othembekileyo uzabusiswa ngokuphumelela, kodwa ogijimela ukunotha kayikuphepha ekujezisweni.

21 Ukubandlulula abantu kakulunganga ikanti umuntu uyona ukuze azuze ucezu lwesinkwa.

22 Umuntu oncitshanayo utshisekela ukunotha kodwa kaboni ukuthi unyenyelwa yibuyanga.

23 Lowo okhuza umuntu uzacina esethandeka kulalowo ololimi olukhohlisayo.

24 Lowo owebela uyise loba unina athi, “Akusinto embi” uyafana lomuntu obhidlizayo.

25 Umuntu olomhawu ubanga ingxabano, kodwa lowo omethembayo uJehova uzaphumelela.

26 Lowo ozithembayo yena uyisiwula, kodwa lowo ohamba ngenhlakanipho uvikelekile.

27 Lowo ophayo abayanga kayikuswela lutho, kodwa ovala amehlo ingathi kababoni uzuza iziqalekiso ezinengi.

28 Lapho izigangi zisiba yiziphathamandla abantu bayacatsha; kodwa nxa kusifa izixhwali abalungileyo bayaphumelela.